تخطي واسامح ونت ماكنك أخطيت
وتزعل واصالح واعذرك في غيابك
يا شين طبعك كل ما جيت صديت
وياشين حظي لي متى اطرد سرابك
قاسي ويا ما في عذابي تماديت
وياما ضميت ولاروتي سحابك
الحين بس اسمح لي اقول قفيت
قفيت دام الغدر ميزت جنابك
برحل وقول اني على البعد شبيت
برحل وسد الريح من صوب بابك
ولعن سنين الحب واقول زليت
زليت يومك خنتني في شبابك
ظالم عساك بدنيتك ماتهنيت
وعساك تشقى انت ولي سعا بك
خنت العهود واول الناس حبيت
خنت الحروف الي باول كتابك
خنت الرسايل والهدايا وياليت
ماخنت ذاك الي بحبه رقا بك
ذاك الصويب الي بجره تعنيت
ذاك الذي تدميه طعنت حرابك
خلاص انا من كل مابي تعافيت
غلطه وعدت ونكشف زيف مابك
صدمه وفقت وعقبها رحت صليت
لله شكر وقلت عنده حسابك
خلاص يلي خنت حبي تناسيت
ناسيك يالي خنتني في شبابك